Chamila Karawita reporting from Pallekele

ලංකා ප්‍රිමියර් ලීග් ඉතිහාසයේ ශතකයක් වාර්තා කරන ලද සිව්වැනි පිතිකරුවා බවට බාබර් අසාම් ඉතිහාස ගත වූ ගෝල් ටැයිටෑන්ස්ට එරෙහි තරගයේදී කඩුලු 7 ක විශිෂ්ඨ ජයක් වාර්තා කිරීමට කලම්බු ස්ට්‍රයිකර්ස් කණ්ඩායම අද (07 දා) සමත්විය. මෙය කලම්බු ස්ට්‍රයිකර්ස් මෙවර තරගාවලියේ ලද දෙවැනි තරග ජය ලෙසින්ද සටහන් විය.

10 වැනි තරගය ලෙසින් පල්ලෙකැලේ ජාත්‍යන්තර ක්‍රීඩාංගණයේ පැවැති මෙම තරගයේදී ජයග්‍රහණය සඳහා ලකුණු 189 ක ඉලක්කයක් හඹා ගිය කලම්බු පිතිකරුවෝ පන්දුවක් ඉතිරිව තිබියදී ඉලක්කය සපුරා ගන්නා ලද්දේ කඩුලු 3 ක් පමණක් ප්‍රතිවාදීන් හමුවේ ලබා දෙමිනි.

තම කණ්ඩායම වෙනුවෙන් විශිෂ්ඨ පිතිහරඹයක නියැළි බාබර් අසාම්, පන්දු 59 කදී ලකුණු 104 ක් ලබා ගත්තේය. ඉනිම ආරම්භයේ සිට අවසන් පන්දුවාරයේ පළමු පන්දුව තෙක් කඩුල්ලේ රැඳී සිටි අසාම් හයේ පහර 5 ක් සහ හතරේ පහර 8 ක් තම ඉනිමට ඇතුළත් කළේය. බාබර් දැවී යන විටත් ඔහු එල්.පී.එල්. තරග ඉතිහාසයේ පිතිකරුවකු වාර්තා කරන ලද ඉහළම ලකුණු සංඛ්‍යාවේ වාර්තාවටද හිමිකම් කීවේය.

එමෙන්ම මෙම ශතකය බාබර්ගේ 10 වැනි විස්සයි-20 ශතකය ලෙසින් වාර්තා පොත් අතරට එක් විය. ඒ අනුව එය ලොව වැඩිම විස්සයි-20 ශතක ලාභීන් අතර දෙවැනි ස්ථානය දක්වා බාබර්ව ඉදිරියට ගෙන ඒමට සමත්වීම කැපී පෙනෙයි. එම ලැයිස්තුවේ අංක 1 පසුවන්නේ බටහිර ඉන්දීය කොදෙව් කණ්ඩායම නියෝජනය කරන ලද ක්‍රිස් ගේල් වන අතර ඔහු ශතක 22 ක් ලබා ගෙන තිබේ.

මීට පෙර කලම්බු කිංග්ස් හි ලොරී එවන්ස් (108*), කැන්ඩි ෆැල්කන්ස්හි ඇන්ඩ්‍රෙ ෆ්ලෙචර් (102*) සහ ජැෆ්නා කිංග්ස් කණ්ඩායම නියෝජනය කරද්දී අවිශ්ක ප්‍රනාන්දු (100) මීට පෙර ශතක ලාභීහු විය.

පැතුම් නිස්සංක සමග එක්වුණු බාබර් අසාම් පළමු කඩුල්ල වෙනුවෙන් පන්දු 75 කදී ලකුණු 111 ක සම්බන්ධතාවක් පැවැත්වූ බාබර් කලම්බු ජයග්‍රහණයට ලකුණු 14 ක් ඉතිරිව තිබියදී දවා ගැනීමට කසුන් රජිත සමත්විය. මෙහිදී පැතුම්ගේ ඉනිම පන්දු 40 කදී ලකුණු 54 ක් ලෙසින් සටහන් වූයේ හයේ පහරක් සහ හතරේ පහර 5 ක් ඉනිමේ ඇතුළත් වෙමිනි.

කෙසේ වෙතත් තම ජාතික කණ්ඩායමේ නායකයාගේ ඉනිම අපතේ නොහරින්නට වග බලා ගත් මොහොමඩ් නවාස්, පළමු පන්දු 2 ට ලකුණු 2 කින් පැති මාරු කර ගත් අතර අවසන් පන්දු 2 ට හයේ සහ හතරේ පහර බැගින් කාලෝචිත පහර එල්ල කරමින්, තරගය ජයග්‍රහණය කරා රැගෙන ගියේය.

පළමුවෙන් පන්දුවට පහර දුන් ගෝල් ටයිටෑන්ස් පිල වෙනුවෙන් කැපී පෙනෙන පිතිහරඹය දියත් කරන ලද්දේ ටිම් සීෆර්ට් විසිනි. පන්දු 35 කට මුහුණ දුන් සීෆර්ට්ගේ ලකුණු 54 කින් සමන්විත නොබිඳුණු ඉනිමට හයේ පහර 3 ක් සහ හතරේ පහර 4 ක් ඇතුළත්ව තිබිණ. මෙය මෙවර තරග වාරයේදී සීෆර්ට් රැස් කරන ලද දෙවැනි අර්ධ ශතකය ලෙසින් සටහන් විය.

භානුක රාජපක්ෂ ලකුණු 30 ක් ලබා ගත්තද ඔහුට නිසියාකාරව පන්දුවට  පහර එල්ල කිරීමට අවස්ථාව නොලැබිණ. වේගයෙන් පන්දුවට පහර දෙන පිතිකරුවකු ලෙස ප්‍රචලිත භානුක එම ලකුණු 30 ලබා ගැනීම සඳහා පන්දු 31 ක් වැය කර තිබුණේ ඉනිම හතරේ පහර 2 කින් පමණක් වර්ණවත් කරගනිමිනි.

පිතිකරුවන්ට වඩා යෝග්‍ය ලෙසින් හැසිරිණු පල්ලේකැලේ තණතීරුවේදී පළමු කඩුල්ල වෙනුවෙන් ලකුණු 87 ක් එක් කිරීමට ලසිත් කෲස්පුල්ලේ (36) සහ ෂෙවෝන් ඩැනියල් (49) සමත්විය. පන්දු 41 කට පමණක් මුහුණ දුන් ෂෙවෝන් තම ඉනිම සඳහා හයේ පහර 2 ක් සහ හතරේ පහර 5 කින් වර්ණවත් කරගත්තේය.

අද දිනයේදී සුවිශේෂී ඉනිම ක්‍රීඩා කළ බාබර් අසාම් මෙම ශතකයත් සමග තරගාවලියේ වැඩිම ලකුණු ලාභීන් අතර පෙරමුණ ගත්තේය. මේ වන විටත් තරග 4 කට ක්‍රීඩා කර ඇති බාබර් ලකුණු 211 ක් ලබා සිටින්නේ ඉනිමක ලකුණු ලබා ගැනීමේ සාමාන්‍ය 53.33 ක් සටහන් කරගනිමිනි. මේ හේතුව නිසාම ඔහුට තරගාවලියේ වැඩිම ලකුණු ලාභියා වෙනුවෙන් පිරිනැමෙන ‘ග්‍රීන්’ කැප්තොප්පිය පැළඳීමට අවස්ථාව උදාවිය.

තරගයේ වීරයා – බාබර් අසාම්