ලෝක කුසලාන ක්‍රිකට් තරගාවලියේ ජයග්‍රහණයක් අවශ්‍ය ව තිබූ නිසා තම පෞද්ගලික ලකුණු පිළිබඳ අවධානය යොමු නොකළ බවත්, කණ්ඩායමක් ලෙස අවසන් මොහොත දක්වාම ජයග්‍රහණය පිළීබඳ සැලසුම වු බවත් නෙදර්ලන්තයට එරෙහිව නොදැවී ලකුණු 91ක් ලබා තරගයේ වීරයා සම්මානය දිනූ සධීර සමරවික්‍රම පැවැසීය.

ශ්‍රී ලංකාව හා නෙදර්ලන්තය අතර ලක්නව් භාරත් රත්න ශ්‍රී අතාල් බිහාරි වජ්පායි එකානා ක්‍රීඩාංගණයේදී ඊයේ (21) පැවැති තරගයෙන් ශ්‍රී ලංකාව කඩුලු 5ක පහසු ජයක් වාර්තා කිරීමෙන් අනතුරුව පැවැති මාධ්‍ය හමුවේදී සධීර මේ බව පැවැසීය. 
අහිමිවී ගිය ශතකය නොව කණ්ඩායමේ ජයග්‍රහණය පිළිබඳ සතුටට පත්වන බව හෙතෙම පැවැසීය.

"ලකුණු 100 නොළැඹීම අවාසනාවන්ත දෙයක්. නමුත් ලකුණු 91ක් ලැබීම ගැන සතුටු විය යුතුයි. හැම වෙලාවෙම ජයග්‍රාහී කණ්ඩායමක් වෙන්න අපට අවශ්‍ය වුණා. ඒ නිසා මම ඇත්තටම සතුටු වෙනවා. මම පසුගිය කාලයේ ගොඩක් මහන්සිවි පුහුණුවීම් කළා. ඒ නිසා මේ වගේ ඉනිමක් ගොඩ නගන්න මට හැකියාව ලැබුණා. නෙදර්ලන්ත පන්දු යවන්නන් හොදින් පන්දු යැව්වා. ඒ මගේම ඔවුන්ට තණතිල්ලේ සහයෝගය තිබුණා. ඒ නිසා ඕවර් 40කින් 45කින් තරගය ජය ගන්න අමාරු වුණා. ඒ නිසා අපි කළේ ගොඩක් ගැඹුරට ගිහින් හරි තරගය දිනන්නයි. අලුත් පිතිකරුවෙකුට ඇවිත් සෙට් වෙන්න ලෙහෙසි නෑ. ඒ නිසා ජයග්‍රහණය ලැබෙන තුරු තණතිල්ලේ ඉන්න මා කල්පනා කළා“ 

“ඔව්, අපේ ඉනිමේ මැද කොටස ඇත්තටම අමාරුයි, මොකද වෙලාවකට ඔවුන්ගේ පන්දු යවන්නන් හොදින් තරගයට පිවිසුණා.  මමයි චරිත් දෙන්නාම හිතුවා අන්තිම කොටසේ ලේසි වෙන්නේ නැහැ කියලා, ඒ නිසා මැද ඕවරවල හොඳට බැට් කරන්න ඕනේ කියලා අපි කතා වුණා. තරගයක් දිනන්නයි අපේ සැලසුම වුණේ. දැන් අපට ලැබෙන සෑම තරගයක්ම හරිම වැදගත් වගේම හොදම තරගයි. ඒ නිසා වැරදි කරන්න කිසිම ඉඩක් නෑ. කණ්ඩායමක් විදිහට නිවැරදි තීරණ ගෙන කොහොමද ප්‍රතිවාදීන් මෙල්ල කරන්නේ කියන සැලසුම අපි හදාගත යුතුයි. මෙතැන ඉදන් අපි සියයට සියයක්ම දීලා ක්‍රීඩා කළ යුතුයි“ සධීර පැවැසීය.

“නෙදර්ලන්ත විකට් 6ක් බිදුණු පසු අපි පීඩනය දැම්මා. අපේ පන්දු යවන්නන් ඉති හොදින් පන්දු යැව්වා. නමුත් ඔවුන් හොද සම්බන්ධතාවක් යෙදුවා. ඒ නිසා නෙදර්ලන්තය හොද ලකුණු ගණනක් ගත්තා. කසුන් හා ඩිල්ෂාන් මුල සිටම හොදින් පන්දු යැව්වා. ඒ නිසා යම් දුරකට නෙදර්ලන්තය පාලනය වුණා“

මහේලගේ සහයෝගය හා උපදෙස් මෙවැනි ජයග්‍රහණයට කෙබඳු දායකත්වයක් ලැබෙන්නේද යන්න මාධ්‍යෙව්දියෙකු විමසා සිටිද්දී සධීර පැවැසූවේ මහේල යනු පුරාවෘත්තයක් බවය. “මහේලගේ සේවය මේ වගේ තරගවලදී වැදගත්. අපට ඔහුගෙන් ඕනෑම උපදෙසක් ලබා ගත හැකිය. ඔහු තරගයකදී විශාල අවස්ථාවන් සමඟ කටයුතු කරන්නේ කෙසේදැයි හොදින්ම දන්නා කෙනෙක්. අත්දැකීම් බහුල ඔහු වැනි අයෙකු සමඟ වැඩ කරන්න ලැබීම ගැන ඇත්තටම සතුටුයි“ සධීර සමරවික්‍රම පැවැසීය.