කළම්බු ස්ට්‍රයිකර්ස් සහ කැන්ඩි ෆැල්කන්ස් අතර ජූලි 06 වැනිදා දඹුල්ලේදී පැවැති ලංකා ප්‍රිමියර් ලීග් තරගය කණ්ඩායම් දෙකම ලකුණු දෙසීයයේ සීමාව අසළටම පැමිණ තියුණුම මුහුණුවරක් ඉසිලුවත් එම තරගය කළම්බු ස්ට්‍රයිකර්ස්ට ජය ගැනීමට හැකි වුයේ කණ්ඩායම් හැඟීමෙන් එකමුතුව ක්‍රීඩා කිරීමෙන් යැයි තරගයේ දක්ෂතම ක්‍රීඩකයා ලෙස තේරුණු කළම්බු ස්ට්‍රයිකර්ස් කණ්ඩායමේ වේගපන්දු යවන මතීෂ පතිරණ පවසයි.
මතීෂ පතිරණ මේ තරගයේදී ලකුණු 26කට කඩුලු හතරක් දවාලීමට සමත් විය.
“මා යැවු ඕවර හතරෙන් කඩුලු හතරක් ලැබුණත් එම පන්දු යැවීමෙන් (එම ඕවර හතරෙන්) පමණක් තරගය ජයගත හැකි නොවෙයි. මෙය සියලු ක්‍රීඩකයන්ගේ දැඩි උනන්දුව මත අප ලබාගත් ජයග්‍රහණයක්.“
අපගේ ප්‍රථම තරගයේදී කණ්ඩායමේ පන්දු රැකීමේ දුර්වලතා රැසක්ම තිබුණත් මේ වන විට අපට ඒවා සකස් කර ගැනීමට අවස්ථාව සැළසී තිබෙනවා. මේ තරගයේදී අප කොතරම් හොඳින් ක්‍රීඩා කළත් අපට විශාල පීඩනයකට මුහුණ දීමට සිදු වුවා. එය අභිබවා ජය ගැනීම අපගේ සාර්ථකත්වයට හේතු වුවා.
තරගයට පෙර දඹුල්ල ජාත්‍යන්තර ක්‍රිකට් ක්‍රීඩාංගණයේ තණතිල්ල පරීක්ෂා කිරීමේදී අපට පෙනී ගියා මේ තණතිල්ලේ කණ්ඩායමකට ලකුණු 200 – 210ක් රැස් කරන්න පුළුවන් ඒත් තරගය අපට ජයගත හැකි බව අප දැන සිටියා. එය එසේම සිදු වුයේ කණ්ඩායම් හැඟීම හොඳින් බලපෑම මත යැයි ද මතීෂ පතිරණ කීවේය.
අපගේ ප්‍රතිවාදීන් වූ කැන්ඩි ෆැල්කන්ස් කණ්ඩායමේ ක්‍රීඩකයන් ඉතාමත් පළපුරුදු ක්‍රිකට් තරග රාශියකට සහභාගි වූ දක්ෂ පිරිසක් ලෙස නම් කළ හැකි බව කී මතීෂ පතිරණ තමා පන්දු යවන විට ලකුණු නොදී පන්දුව නියමිත ස්ථානයන්ට පතිත කිරීමෙන් කඩුලු දවා ගැනීමට අවස්ථාව උදා වූ බව ද කීවේය.
තරගය පවතින විට තම කණ්ඩායම බලාපොරොත්තු වුවාට වඩා පීඩනයකට පත් වූ බව අප විසින්ම පිළිගත යුතුව ඇතැයි කී මතීෂ පතිරණ ප්‍රතිවාදී කණ්ඩායමේ ජ්‍යෙෂ්ඨ පළපුරුදු ක්‍රීඩකයන් රැසක්ම සිටියදී එම පීඩනය ජය ගැනීම අප ලත් විශාල ජයග්‍රහණයක් යැයි ද පැවසීය.
