ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන නැෂනල් යූත් ලීග් වයස අවුරුදු 19 න් පහළ බාළිකා ක්‍රිකට් තරගාවලියේ හෙට (15 වැනිදා) පැවැත්වීමට නියමිත අවසන් මහ තරගයේදී ගාල්ල කණ්ඩායමේ ප්‍රතිවාදීන් බවට පත්වීමට මහනුවර කණ්ඩායම සමත්විය. ඒ අනුව දෙපිළ අතර අවසන් මහ තරගය හෙට පෙ.ව. 9.30 හම්බන්තොට මහින්ද රාජපක්ෂ ක්‍රීඩාංගණයේදී පැවැත්වෙනු ඇත.

මෙතෙක් තරගාවලියේ සාර්ථකම කණ්ඩායම බවට පත්ව සිටින ගාල්ල කණ්ඩායම කොළඹ කණ්ඩායමට එරෙහිව අද පැවැති තරගයද කඩුලු 7 කින් ජය ගනිමින් අපරාජිතව අවසන් මහ තරග වරම උදාකර ගත්තේය. මූලික වටය යටතේ සහභාගිවුණු තරග 6 න් එක් තරගයක් වැස්සට සේදී යෑම හැරුණු කොට සෙසු තරග 5 ම ජය ගනිමින් අවසන් මහ තරග වරමට අපරාජිතව රශ්මිකා සෙව්වන්දිගේ නායකත්වයෙන් යුතු ගාල්ල කණ්ඩායම සුදුසුකම් ලබා ගැනීමට සමත්වූවේය.

මීට අමතරව අද පැවැති අනෙක් තරගය වුණු දඹුල්ල පිලට එරෙහි තරගයෙන් කඩුලු 5 ක පහසු ජයක් වාර්තා කළ අසේනි තලගුණේගේ නායකත්වයෙන් යුතු මහනුවර කණ්ඩායම මූලික වටයේ තරග 4 ක් ජය ගනිමින් අවසන් මහ තරග වරම උදා කර ගත්තේය.

පෙරවරුවේ පැවැති තරගයේදී දඹුල්ල කණ්ඩායම ලකුණු 71 කට සීමා කළ මහනුවර කණ්ඩායම එය හඹා යෑමේදී පන්දුවාර 13.2 කදී කඩුලු 5 ක් පමණක් දැවී ඉලක්කය සපුරා ගැනීමට සමත්විය.

පස්වරුවේ පැවැති තරගයේදී පළමුව පන්දුවට පහර දුන් කොළඹ කණ්ඩායම පන්දුවාර 20 කදී කඩුලු 5 ක් දැවී ලකුණු 103 ක් රැස් කරන ලදුව එය හඹා යෑමේදී ගාල්ල කණ්ඩායම පන්දුවාර 15.3 කදී කඩුලු 3 ක් පමණක් දැවී රැස් කර ගැනීමට සමත්විය.

මහනුවර – දඹුල්ල

දඹුල්ල කණ්ඩායම පන්දුවාර 18.3 කදී සියලු දෙනා දැවී ලකුණු 71 යි.

චලනි කවීෂා 13, දනෝද්‍යා සෙව්මිණී 16, යූ.ඩී. සොපිකා 08/3, මනීෂා හේරත් 11/2

මහනුවර කණ්ඩායම පන්දුවාර 13.2 කදී කඩුලු 5 ක් දැවී ලකුණු 72 යි

හිරුණි දිසානායක 22, කවිෂ්කා අබේරත්න 16*, සඳුනි බොලවත්ත 15*, 

ගාල්ල – කොළඹ

කොළඹ පන්දුවාර 20 කදී කඩුලු 5 ට ලකුණු 103 යි

හසිනි විජේසිංහ 10, එරන්දි වර්ණකුලසූරිය 15, දහමි සෙනෙත්මා 40*, විශ්මි සොයිසා 13*, චමෝදි මුණසිංහ 10/2

ගාල්ල පන්දුවාර 15.3 කදී කඩුලු 3 ක් දැවී ලකුණු 104 යි

සංජනා කාවින්දි 42*, සුමුදු නිසංසලා 21, රශ්මිකා සෙව්වන්දි 23