ගෙවී ගිය වසරේ පාසල් ක්‍රිකට් පිටියේ හපන්කම්, දක්ෂතා හැකියා, තැබූ වාර්තා ඇගැයීමට ලක් කරනු වස් ශ්‍රී ලංකා පාසල් ක්‍රිකට් සංගමය විසින් ශ්‍රී ලංකා ක්‍රිකට් ආයතනය සමග අත්වැල් බැඳගෙන මෙවර පැවැත්වෙන්නේ 46 වැනි වර්ණ ප්‍රදානය වේ. ඒ අනුව මෙවර සම්මාන ප්‍රධානය සම්මාන 108 කින් යුක්ත වන අතර එහි වඩාත්ම ආකර්ශනීය සම්මානය වන වසරේ ක්‍රීඩකයා සහ ක්‍රීඩිකාව ලෙසින් ශ්‍රී ලංකා අවු. 19 න් පහළ කණ්ඩායමේ නායක දිනුර කලුපහන සහ ජාතික කණ්ඩායමේ ආරම්භක පිතිකාරිණී විශ්මි ගුණරත්න සම්මාන ලැබීමට නියමිතය.

ශ්‍රී ලංකා ක්‍රිකට් ආයතනයේ පූර්ණ සහයෝගය ඇතිව ශ්‍රී ලංකා පාසල් ක්‍රිකට් සංගමය විසින් පවත්වනු ලබන වයස අවුරුදු 19 න් පහළ පාසල් වර්ණ ප්‍රධානය අද (26 දා) කොළඹ බණ්ඩාරනායක අනුස්මරණ සම්මන්ත්‍රණ ශාලාවේදී ප.ව. 3 ට ආරම්භ වනු ඇත.

මෙම වර්ණ ප්‍රධානයේ ප්‍රධාන ආරාධිතයින් ලෙස ශ්‍රී ලංකා ක්‍රිකට් ආයතනයේ සභාපති ශම්මි සිල්වා මහතා සහ ශ්‍රී ලංකා පිලේ වේග පන්දු යවන ක්‍රීඩක මතීෂ පතිරණ සහභාගිවනු ඇත. ශ්‍රී ලංකා ක්‍රිකට් ආයතනයේ උප සභාපතිවරුන් වන රවීන් වික්‍රමරත්න, ආචාර්ය ජයන්ත ධර්මදාස, වැඩ බලන ලේකම් ක්‍රිෂාන්ත කපුවත්ත, භාණ්ඩාගාරික සුජීව ගොඩලියැද්ද, උප භාණ්ඩාගාරික ලසින්ත වික්‍රමසිංහ සහ ප්‍රධාන විධායක නිලධාරී ඈෂ්ලී ද සිල්වා යන මහත්වරුන්ට අමතරව විධායක කමිටු සාමාජික මහත්වරුද සහභාගිවීමට නියමිතව සිටිති. ඊට අමතරව ශ්‍රී ලංකා පාසල් ක්‍රිකට් සංගමයේ සභාපති තිලක් වත්තුහේවා මහතා ඇතුළු ශ්‍රි ලංකා ක්‍රිකට් ආයතනයේ මෙන්ම පාසල් ක්‍රිකට් සංගමයේ නිලදාරීන්ද මෙම අවස්ථාවට එකතු වනු ඇත.