බංග්ලාදේශ කණ්ඩායමට එරෙහිව පැවැත්වෙන තරග 3 කින් සමන්විත පන්දුවාර විස්සයි-20 ක්‍රිකට් තරගාවලිය සඳහා නම් කරන ලද ශ්‍රී ලංකා කණ්ඩායමට හිටපු නායකයකු වන තුන් ඉරියව් ක්‍රීඩක දසුන් ශානක සහ චාමික කරුණාරත්නව කැඳවීමට ශ්‍රී ලංකා ක්‍රිකට් තේරීම් කමිටුව පියවර ගෙන තිබේ.

කෙසේ වෙතත් චරික්‍රීඩකයින් 17 දෙනෙකුගෙන් නම් කරන ලද ශ්‍රී ලංකා විස්සයි-20 සංචිතය සඳහා ටෙස්ට් සහ එක්දින තරගාවලියේ කැපී පෙනෙන පන්දු යවන්නකු වූ අසිත ප්‍රනාන්දුව විවේක ගන්වා තිබීම විශේෂත්වයක් වේ. ඒ වෙනුවට ලසිත් මාලිංගගේ පන්දු යවන ඉරියව්වට සමාන එෂාන් මාලිංගව කණ්ඩායමට කැඳවා තිබේ. ශ්‍රී ලංකාව අවසන් වරට තරග සංචාරය කරන ලද නවසීලන්ත තරග සංචාරය සඳහා ක්‍රීඩකයින් 16 දෙනෙකු ඇතුළත්ව සිටියද මෙම තරගාවලිය සදහා ක්‍රීඩකයින් 17 දෙනෙක් නම් කර තිබෙන අතර එහිදී නවසීලන්ත තරග සංචාරයට ඇතුළත් නොවුණු තුන් ඉරියව් ක්‍රීඩක දුනිත් වෙල්ලාලගේටද ස්ථානයක් වෙන්ව තිබේ.

තුන් ඉරියව් ක්‍රීඩකයකු ලෙසින් කණ්ඩායමට එක්ව සිටින දසුන් ශානක අවසන් වරට ශ්‍රී ලංකාව වෙනුවෙන් විස්සයි-20 ජාත්‍යන්තර තරගයක් නියෝජනය කරන ලද්දේ 2024 වසරේ ජූලි මාසයේදීය. නමුත් ඔහු මෑතකදී පැවැති පෞද්ගලික විස්සයි-20 තරගාවලිවලදී කැපී පෙනෙන දක්ෂතා දක්වමින් තේරීම් කමිටුවේ අවධානය දිනා ගැනීමට සමත්ව සිටින්නේය.

කණ්ඩායමට ඇතුළත්ව සිටින අනෙක් තුන් ඉරියව් ක්‍රීඩකයා වන චාමික කරුණාරත්නද අවසන් වතාවට ශ්‍රී ලංකාව නියෝජනය කළ ඇත්තේ මීට වසර 2 කට පෙර හෙවත් 2023 වසරේ නොවැම්බර් මාසයේදීය.

බංග්ලාදේශයට එරෙහිව පැවැත්වෙන පළමු විස්සයි-20 තරගය ජූලි මස 10 වැනිදා මහනුවර පල්ලේකැලේ ජාත්‍යන්තර ක්‍රීඩාංගණයේදී පැවැත්වෙන අතර දෙවැනි තරගය 13 වැනිදා රංගිරි දඹුලු ක්‍රීඩාංගණයේදීද තෙවැන්න 16 වැනිදා කොළඹ ආර්. ප්‍රේමදාස ක්‍රීඩාංගණයේදීද පැවැත්වෙනු ඇත.

ශ්‍රී ලංකා විස්සයි-20 සංචිතය – චරිත් අසලංක (නායක), පැතුම් නිස්සංක, කුසල් මෙන්ඩිස්, කුසල් පෙරේරා, අවිශ්ක ප්‍රනාන්දු, කමිඳු මෙන්ඩිස්, දිනේෂ් චන්දිමාල්, දසුන් ශානක, දුනිත් වෙල්ලාලගේ, චාමික කරුණාරත්න, වනිඳු හසරංග, මහීෂ් තීක්ෂණ, මතුර පතිරණ, නුවන් තුෂාර, එෂාන් මාලිංග.