ශ්‍රී ලංකා වයස අවුරුදු 19 න් පහළ යොවුන් කණ්ඩායම මෙන්ම නැගී එන කණ්ඩායම් ශ්‍රී ලංකාවේ තරග වදිනු ලබන තරගාවලි ඇතුළු ශ්‍රී ලංකා ක්‍රිකට් ආයතනය විසින් සංවිධානය කරනු ලබන දේශීය ක්‍රිකට් තරගාවලිවල නිල විකාශන සහ ඉසව් අයිතිය තින්ක්යුබ් සිස්ටම්ස් පුද්ගලික සමාගම සහ කොන්ටෙන්ටට් අයි. ඒෂියා පුද්ගලික සමාගම ලබාදීමට ශ්‍රී ලංකා ක්‍රිකට් ආයතනය තීරණය කර තිබේ.

2025 වසරේ අප්‍රේල් මස 24 වැනිදා සිට බල පැවැත්වෙන පරිදි දෙපාර්ශ්වය අතර වන මෙම හවුල්කාරීත්වය හරහා ශ්‍රී ලංකාවේ දේශීය, යොවුන් සහ නැගීඑන කණ්ඩායම්වල ක්‍රිකට් ක්‍රීඩාවේ අඛණ්ඩ වර්ධනයක් ඇතිවීමට වැදගත් සංධිස්ථානයක් ලෙසින් සලකනු ඇත.

අදාළ ගිවිසුම හරහා දේශීය වශයෙන් සංවිධානය කෙරෙන සියලුම පිරිමි කණ්ඩායම්වල දේශීය ක්‍රිකට් තරග වලට අමතරව ශ්‍රී ලංකා ‘ඒ‘ කණ්ඩායම, නැගීඑන කණ්ඩායම සහ අවු. 19 න් පහළ යොවුන් කණ්ඩායම, ශ්‍රී ලංකාවේ තරග වදිනු ලබන සියලුම තරගාවලි විකාශන කටයුතු සිදුකෙරෙනු ඇත. ඊට අමතරව ශ්‍රී ලංකා කාන්තා ‘ඒ‘ කණ්ඩායමේ සහ අවුරුදු 19 න් පහළ බාළිකා ක්‍රිකට් කණ්ඩායම ශ්‍රී ලංකාවේදී තරග වදිනු ලබන තරගාවලිද මෙම විකාශනය කෙරෙන තරගාවලිවලට ඇතුළත්වෙති.

එසේ විකාශය කරනු ලබන ක්‍රිකට් තරග තින්ක්යූබ් සිස්ටම්ස් පෞද්ගලික සමාගමේ නිල නාළිකාව වන ටැලන්ට් ටීවී (Talent TV) නාළිකාව ඔස්සේ නොමිලේ විකාශය කෙරෙනු ඇත. අන්තර්ජාලය ඔස්සේ මුදල් ගෙවීමෙන් නැරඹිය හැකි OTT වේදිකාවක් වන www.talenttv.lk ඔස්සේ සහ ශ්‍රී ලංකා ක්‍රිකට් යූ ටියුබ් නාළිකාව ඔස්සේද නැරඹිය හැකිය.

ඊට අමතරව UHF  නාළිකා 47 (දිවයින පුරා), UHF නාළිකා 22 (කොළඹ), UHF නාළිකා 28 (දකුණු පළාත), UHF නාළිකා 32 (කරගහතැන්න) සහ UHF නාළිකා 56 (රත්නපුර) සංඛ්‍යාත හරහා දිවයින පුරා ටැලන්ට් රූපවාහිනියට ප්‍රවේශ විය හැකිය.

මේ පිළිබඳව අදහස් දක්වා සිටින ශ්‍රී ලංකා ක්‍රිකට් ආයතනයේ ප්‍රධාන විධායක නිලධාරී ඈෂ්ලී ද සිල්වා මහතා, “මෙම හවුල්කාරිත්වය ඔස්සේ අපි දේශීයෙ වශයෙන් ශ්‍රී ලංකාවේ තරුණ සහ නැගී එන ක්‍රිකට් ක්‍රීඩාව ප්‍රදර්ශනය කරමින් පරිවර්තනීය වෙනසක් නියෝජනය කරනු ඇත. මෙම සහයෝගීතාවයෙන්, රසිකයින්ට මෙම තරඟ සජීවීව නැරඹීමට හැකි වනු ඇති අතර, අපගේ ක්‍රීඩකයින්ට සහ ඔවුන්ගේ කාර්ය සාධනයට වැඩි දායකත්වයක් ලබා දෙනු ඇත“ යනුවෙනි.

මෙම හවුල්කාරිත්වය ක්‍රීඩකයින්, රසිකයින් සහ අනුග්‍රාහකයින් ඇතුළු සියලුම පාර්ශවකරුවන්ට ප්‍රතිලාභ ලබා දෙමින් එහි දේශීය, තරුණ සහ නැගී එන ක්‍රිකට් ක්‍රීඩාවේ ප්‍රවේශය සහ නිරාවරණය සැලකිය යුතු ලෙස පුළුල් කරනු ඇතැයි ශ්‍රී ලංකා ක්‍රිකට් ආයතනය විශ්වාස කරයි.

“මෙම දිගුකාලීන සන්ධානය ශ්‍රී ලංකාවේ දේශීය ක්‍රීඩාව සඳහා නැවුම් යුගයක් උදා කරයි. අපගේම රට පුරා නොමිලේ විකාශන නාලිකාවක් වන “ටැලන්ට් ටීවී” සමඟ වැඩිදියුණු කළ නිෂ්පාදන සහ විකාශන ගුණාත්මකභාවය සහ ප්‍රමුඛ ජාත්‍යන්තර විකාශකයින් සමඟ හවුල්කාරිත්වයන් මගින්, අපි සෑම තරඟයක්ම දිවයින පුරා නිවෙස්වලට සහ ලොව පුරා ප්‍රේක්ෂකයින් වෙත ගෙන එන්නෙමු. අපගේ ප්‍රවේශය වාණිජ වටිනාකම උපරිම කරයි, ඩිජිටල් සහ OTT සහභාගීත්වය මෙහෙයවන අතර, වඩාත්ම වැදගත් දෙය නම් නැගී එන දේශීය දක්ෂයින්ට බැබළීමට සහ ඉදිරියට යාමට අවශ්‍ය වේදිකාව සහ නිරාවරණය ලබා දීමයි. බාධාවකින් තොරව තරඟාවලි බෙදා හැරීම සහ ක්‍රීඩාවේ තිරසාර වර්ධනය සඳහා අපි කැපවී සිටිමු,”  යැයි තින්ක්යූබ් සිස්ටම්ස් පුද්ගලික සමාගමේ අධ්‍යක්ෂක දමිත කාරියවසම් මහතා සඳහන් කර සිටියේය.

හවුල්කාරිත්වයේ ආරම්භක අදියර යටතේ, ප්‍රධාන තරඟාවලි කිහිපයක් දැනටමත් සාර්ථකව විකාශනය කර තිබෙන අතර එම තරගාවලි අතර අන්තර් සමාජ ප්‍රධානතම පන්දුවාර විස්සයි-20 තරගාවලිය, අන්තර් සමාජ ප්‍රධානතම පන්දුවාර 50 තරගාවලි්‍ය, අන්තර් සමාජ ටියර් බී කොටසේ පන්දුවාර විස්සයි-20 තරගාවලිය සහ පන්දුවාර 50 තරගාවලිය සහ ශ්‍රී ලංකා වයස අවුරුදු 19 න් පහළ ක්‍රිකට් කණ්ඩායමේ තරගාවලීන් වෙති.