ශ්‍රී ලංකා ක්‍රිකට් ආයතනය විසින් මේ දිනවල පවත්වනු ලබන දේශීය තරගාවලි 3 ක් අයහපත් කාලගුණ තත්ත්වය හේතුවෙන් කල් දැමීමට ශ්‍රී ලංකා ක්‍රිකට් තරගාවලි සංවිධායක කමිටුව විසින් තීරණය කර තිබේ. එ අතර මෙරට පැවැත්වෙන අන්තර් සමාජ ප්‍රධානතම තුන්දින ක්‍රිකට් තරගාවලියද වේ.

ප්‍රමුඛ පෙළ කණ්ඩායම් 12කගේ සහභාගිත්වයෙන් පැවැත්වීමට නියමිත අන්තර් සමාජ ප්‍රධානතම තුන්දින ක්‍රිකට් තරගාවලියේ සමාරම්භය හෙට (28 වැනිදා) දිනයේදී සිදුකිරීමට නියමිත වුවත්, පවතින අයහපත් කාලගුණ තත්ත්වය මත එය ආරම්භය ලබන දෙසැම්බර් 05 වැනිදා නියම කර ඇත.

මීට අමතරව ඉකුත් 26 වැනිදා ආරම්භ වුණු අන්තර් සමාජ ටියර් ‘බී‘ කොටසේ තුන්දින ක්‍රිකට් තරගාවලිය යටතේ හෙට ඇරැඹීමට නියමිත තරගවලට අමතරව කොළඹ තර්ස්ටන් විදුහල් ක්‍රීඩා පිටියේදී හෙට (28 දා) පැවැත්වීමට නියමිතව තිබූ ප්‍රීමා කුසලාන වෙනුවෙන් ක්‍රියාත්මක අවුරුදු 15 න් පහළ ශ්‍රී ලංකා යූත් ලීග් ක්‍රිකට් තරගාවලියේ අවසන් මහ තරගය ද කල් දැමීමට පියවර ගෙන තිබේ.

ටියර් ‘බී‘ කොටසේ තරග ද ලබන දෙසැම්බර් මස 05 වැනිදා දක්වා කල් දැමුණු නමුත්, ප්‍රීමා කුසලාන අවුරුදු 15 න් පහළ තරගාවලිය පැවැත්වෙන්නේ කවදාද යන්න මෙතෙක් තීරණය කොට නොමැත. ඒ අනුව එම දිනය ඉදිරියේදී දැනුම් දෙනු ඇත.