බංග්ලාදේශයේ තරග සංචාරයක නිරතව සිටින ශ්‍රී ලංකා කාන්තා ක්‍රිකට් කණ්ඩායම සහ බංග්ලාදේශ කාන්තා කණ්ඩායම අතර පැවැත්වෙන තෙවැනි හා අවසන් එක්දින ක්‍රිකට් තරගය හෙට (25 වැනිදා) රාජ්ශාහිහිදී පැවැත්වීමට නියමිතය.

තරගාවලියේ පළමු තරගය බංග්ලාදේශ කණ්ඩායම ජයගත් අතර, දෙවැනි තරගයේදී ශ්‍රී ලංකා කාන්තා කණ්ඩායම විශිෂ්ට ජයග්‍රහණයක් ලබා තරගාවලිය 1-1 ලෙස සමබර තත්ත්වයකට ගෙන ඒමට සමත් විය. ඒ අනුව තරගාවලියේ ශූරියන් තීරණය වන අවසන් තරගය, දැඩි තරගකාරීත්වයකින් යුත් අවසන් මහ තරගයක ස්වරූපයක් ගනු ඇතැයි අපේක්ෂා කෙරේ.

මෙම තීරණාත්මක තරගය ඉලක්ක කරගනිමින් ශ්‍රී ලංකා කාන්තා ක්‍රීඩිකාවෝ අද දිනයේදීද සිය පුහුණුවීම්වල නිරත වූහ. පන්දුවට පහරදීම, පන්දු යැවීම සහ ප්දු රැකීම යන තුන් ඉරියව්වේම දක්ෂතා තවදුරටත් ශක්තිමත් කරගැනීමට කණ්ඩායම විශේෂ අවධානයක් යොමු කරනු ලැබීය.

තරගාවලිය 1-1 ලෙස සමව පවතින බැවින්, හෙට තරගයේ ජයග්‍රහණය ලබාගන්නා කණ්ඩායමට තරගාවලියේ ශූරතාවය හිමිවනු ඇත. ඒ අනුව හෙට දිනයේදී ශ්‍රී ලංකා කාන්තා කණ්ඩායමතම උපරිම දක්ෂතාවය පෙන්වීම අතිශය වැදගත් වේ.