ප්‍රේක්ෂකයින් නොඉවසිල්ලෙන් බලා සිටින ලංකා ප්‍රිමියර් ලීග් හෙවත් LPL තෙවැනි අදියර නැරඹීම සඳහා වන ප්‍රවේශ පත්‍ර අළෙවිය අද (04 දා) සිට ආරම්භ කිරීමට ශ්‍රී ලංකා ක්‍රිකට් ආයතනය පියවර ගෙන තිබේ.

ක්‍රීඩාංගණ 3 කදී ක්‍රියාත්මක වන මෙවර LPL තරගාවලියේ පළමු තරග 5 හම්බන්තොට මහින්ද රාජපක්ෂ ක්‍රීඩාංගණයේදී පැවැත්වෙන අතර තරග නැරඹීමට කැමැති ක්‍රීඩා  ලෝලීන්ට සිය ප්‍රවේශපත්‍ර මහින්ද රාජපක්ස ක්‍රීඩාංගණයේ පිහිටුවා ඇති ප්‍රවේශ පත්‍ර කවුලු මගින් ලබා ගත හැක. මීට අමතරව www.srilankacricket.lk යන ශ්‍රී ලංකා ක්‍රිකට් ආයතනය වෙබ් අඩෙවියට පිවිසීමේදී සිය ප්‍රවේශ පත්‍ර වෙන් කරවා ගැනීමේ හැකියාව ක්‍රීඩා ලෝලීන්ට පවතින අතර රුපියල් 300, 500, 800, 2500, 3000, 7000 සහ 8000 යන මිල ගණන් යටතේ ප්‍රවේශ පත්‍ර අළෙවි කෙරෙනු ඇත.

අද සිට හම්බන්තොට තරග පැවැත්වෙන අවසන් දිනය වන දෙසැම්බර් 08 වැනිදා දක්වා එම ප්‍රවේශ පත්‍ර කවුලු පෙ.ව. 9.00 සිට ප.ව. 5.00 දක්වා විවෘතව තැබෙනු ඇත. මීට අමතරව තරගාවලියේ මීළඟ තරග පැවැත්වෙන පල්ලකැලේ සහ කොළඹ ක්‍රීඩාංගණවල පැවැත්වෙන තරග සඳහා වන ප්‍රවේශපත්‍ර තරග ආරම්භ වීමට දින 3 කට පෙර එම ක්‍රීඩාංගණවලදී නිකුත් කිරීමට පියවර ගෙන තිබේ.

පල්ලෙකැලේ ක්‍රීඩාංගණයේ පැවැත්වෙන තරග ලබන දෙසැම්බර් 10 වැනිදාද කොළඹ ආර්. ප්‍රේමදාස ක්‍රීඩාංගණයේ තරග දෙසැම්බර් මස 17 වැනිදාද ආරම්භ වනු ඇත. තරගාවලියේ අවසන් මහ තරගය ලබන දෙසැම්බර් මස 23 වැනිදා කොළඹ ආර්. ප්‍රේමදාස ක්‍රීඩාංගණයේදී පැවැත්වෙනු ඇත.