ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන මෙරට ක්‍රියාත්මක ප්‍රධානතම සිව්දින ක්‍රිකට් තරගාවලිය වන නැෂනල් සුපර් ලීග් ක්‍රිකට් තරගාවලියේ අවසන් පූර්ව තරග ලබන 23 වැනිදා සිට 26 වැනිදා දක්වා කොළඹ ආර්. ප්‍රේමදාස සහ පී.සරා ඔවල් යන ක්‍රීඩාංගණවලදී පැවැත්වේ.

කණ්ඩායම් 5 කගේ සහභාගිත්වයෙන් පැවැති මෙවර මූලික වටයේ තරග වලදී වැඩිම ජයග්‍රහණය සංඛ්‍යාවක් වාර්තා කිරීමට සමත්ව සිටින ගෝල්, දඹුල්ල, ජැෆ්නා සහ කැන්ඩි කණ්ඩායම් අවසන් පූර්ව තරග සඳහා සුදුසුකම් ලබා සිටිති. එහිදී ප්‍රසාද ලකුණු සටහනේ පෙරමුණේ පසුවන ගෝල් කණ්ඩායම එහි අවසන් ස්ථානයේ පසුවන කැන්ඩි කණ්ඩායමද දඹුල්ල කණ්ඩායමට එරෙහිව ජැෆ්නා කණ්ඩායමද තරග වදිති.

මෙවර තරගාවලියේ සෑම කණ්ඩායමක්ම මූලික වටය යටතේ තරග 4 කට ක්‍රීඩා කළ අතර එහිදී පුර්ණ ජයග්‍රහණ 2 ක් වාර්තා කළ රමේෂ් මෙන්ඩිස්ගේ නායකත්වයෙන් යුතු ගෝල් කණ්ඩායම ප්‍රසාද ලකුණු 60.055 ක් ලබා එහි පළමු ස්ථානයට පත් වද්දී කලම්බු පිලට එරෙහිව හම්බන්තොට පැවැති තරගයේදී පළමු ඉනිමේ ජයක් වාර්තා කළ දඹුල්ල කණ්ඩායම පූර්ණ තරග ජයග්‍රහණයක් සහ පළමු ඉනිමේ ජයක් ලබා ප්‍රසාද ලකුනු 33.585 ක් ලබා දෙවැනි ස්ථානයට පත්ව සිටියි.

ප්‍රසාද ලකුණු 29.985 ක් ලබා සිටින ජැෆ්නා පිලත්, ප්‍රසාද ලකුනු 27.775 ක් ලබා සිටින කැන්ඩි කණ්ඩායමත් පිළිවෙළින් තෙවැනි සහ සිව්වැනි ස්ථානවල රැදී සිටින අතර තරගාවලියේ එක් පළමු ඉනිමේ ජයක් පමණක් වාර්තා කර ගෙන සිටින කලම්බු කණ්ඩායම එහි පස්වැනි තැනට  පත්ව මූලික වටයෙන්ම ඉවත්ව තිබේ.

තරගාවලියේ අවසන් මහ තරගය ලබන මාර්තු 02 වැනිදා සිට 05 වැනිදා දක්වා ගාල්ල අන්තර්ජාතික ක්‍රීඩාංගණයේදී පැවැත්වෙනු ඇත.

පෙබරවාරි 23 – 26 දක්වා 

පළමු අවසන් පූර්ව තරගය – ගෝල් සහ කැන්ඩි අතර ආර්. ප්‍රේමදාස ක්‍රීඩාංගණයේදී

දෙවැනි අවසන් පූර්ව තරගය – දඹුල්ල සහ ජැෆ්නා අතර පී. සරා ඔවල් ක්‍රීඩාංගණයේදී