වයස අවුරුදු 19 න් පහළ ජාතික කණ්ඩායමට දක්ෂයින් තෝරනු ලබන මිණුම් දණ්ඩයක් ලෙසින් සැලකෙන වයස අවුරුදු 19 න් පහළ යූත් ලීිග් 2024 ක්‍රිකට් තරගාවලිය මෙම මස 24 වැනිදා මග්ගොන සරේ ක්‍රීඩාංගණයේදී ආරම්භ වේ. සමාරම්භක දිනයේදී කොළඹ උතුරු කණ්ඩායමත් කොළඹ දකුණු කණ්ඩායමත් තරග වැදීමට නියමිතය.
ජුනි 24 වැනිදා සිට ජූලි 01 වැනිදා දක්වා පැවැත්වෙන මෙම පන්දුවාර 50 ක්‍රිකට් තරගාවලිය සඳහා මෙවරත් කණ්ඩායම් 5 ක් තරග වදිති. ඉහත කණ්ඩායම් 2 ට අමතරව, ගාල්ල, දඹුල්ල සහ මහනුවර යන කණ්ඩායම් මෙවර තරගාවලිය නියෝජනය කරනු ලබන කණ්ඩායම් වෙති.
මූලික වටය යටතේ සෑම කණ්ඩායමකටම තරග 4 බැගින් ක්‍රීඩා කිරීමට නියමිත අතර එම ප්‍රසාද ලකුණු සටහනේ පළමු ස්ථාන දෙකට පත්වන ඛණ්ඩායම් ලබන ජූලි මස 01 වැනිදා කොළඹ එස්. එස්. සී. ක්‍රීඩාංගණයේදී පැවැත්වීමට නියමිත අවසන් මහ තරගයට ක්‍රීඩා කිරීමට සුදුසුකම් ලබනු ඇත. මෙම තරගාවලියේ මූලික වටයේ තරග සරේ ක්‍රීඩාංගණය හැරුණු කොට ගාල්ල අන්තර්ජාතික ක්‍රීඩාංගණය, කොළඹ තර්ස්ටන් සහ කෝල්ට්ස් යන ක්‍රීඩාංගණවල පැවැත්වේ.
ගතවූ 2023 වසරේ පැවැති යූත් ලීග් තරගාවලියේදී ප්‍රබල කොළඹ උතුරු කණ්ඩායම කඩුලු 6 කින් පරාජයට පත් කරමින් ශූරතාව දිනා ගැනීමට මහනුවර කණ්ඩායම සමත්විය. පල්ලකැලේ ජාත්‍යන්තර ක්‍රීඩාංගණයේ පැවැති මෙම තරගයේදී ජයග්‍රාහී මහනුවර කණ්ඩායම රහල් අමරසිංහ විසින් මෙහෙයවනු ලැබීය.
තරග කාලසටහන
ජුනි 24 – කොළඹ දකුණු සහ කොළඹ උතුර අතර සරේ ක්‍රීඩාංගණය
ජුනි 25 – ගාල්ල සහ දඹුල්ල අතර ගාල්ල ජාත්‍යන්තර ක්‍රීඩාංගණයේදී
ජුනි 25 – මහනුවර සහ කොළඹ උතුර අතර සරේ ක්‍රීඩාංගණයේදී
ජුනි 26 – දඹුල්ල සහ කොළඹ දකුණු අතර තර්ස්ටන් ක්‍රීඩාංගණයේදී
ජුනි 27 – කොළඹ දකුණ සහ මහනුවර අතර තර්ස්ටන් ක්‍රීඩාංගණයේදී
ජුනි 27 – ගාල්ල සහ කොළඹ උතුර අතර ගාල්ල ජාත්‍යන්තර ක්‍රීඩාංගණයේදී
ජුනි 28 – දඹුල්ල සහ මහනුවර අතර කෝල්ට්ස් ක්‍රීඩාංගණයේදී
ජුනි 28 – කොළඹ දකුණ සහ ගාල්ල අතර ගාල්ල ජාත්‍යන්තර ක්‍රීඩාංගණයේදී
ජුනි 30 – මහනුවර සහ ගාල්ල අතර ගාල්ල ජාත්‍යන්තර ක්‍රීඩාංගණයේදී
ජුනි 30 – කොළඹ උතුර සහ දඹුල්ල අතර කෝල්ට්ස් ක්‍රීඩාංගණයේදී
ජූලි 01 – අවසන් මහ තරගය කොළඹ එස්. එස්. සී. ක්‍රීඩාංගණයේදී
