ආසියානු කුසලාන ක්‍රිකට් තරගාවලිය නැරැඹීමට අති විශාල පිරිසක් ශ්‍රී ලංකාවට පැමිණෙන බැවින් මහනුවර ප්‍රදේශයේ සංචාරකයින්ට නවාතැන් ලබාදිය හැකි නිවාස හිමියන් හෝටල් ආකාරයේ ලියාපදිංචියක් ලබා ගන්නා ලෙස ශ්‍රී ලංකා සංචාරක සංවර්ධන අධිකාරියේ (SLTDA) ඉල්ලා සිටියි.

ආසියානු කුසලාන තරඟාවලියේ නවාතැන් සඳහා ඇති ඉහළ ඉල්ලුම සපුරාලීමේ අරමුණින් තම අමතර කාමර, නිවාස හෝ මහල් නිවාස මුදලට කුලියට දීමට කැමති මහනුවර දේපල හිමියන් සඳහා ශ්‍රී ලංකා සංචාරක සංවර්ධන අධිකාරිය විසින් තාවකාලික ලියාපදිංචි කිරීමේ ක්‍රමයක් පිරිනමයි.

මෙම හඳුන්වා දී ඇති නව වැඩ පිළිවෙල අනුව එළැඹෙන ආසියානු කුසලාන ක්‍රිකට් තරගාවලියේදී මහනුවර පදිංචිකරුවන්ගේ නිවාස ඇතුළු දේපළ ලැයිස්තුගත කිරීමට ශ්‍රී ලංකා සංචාරක සංවර්ධන අධිකාරිය (SLTDA) බලාපොරොත්තු වේ.

විශේෂ නිවේදනයක් නිකුත් කරමින් ශ්‍රී ලංකා සංචාරක සංවර්ධන අධිකාරිය මහනුවර නිවාස හිමියන්ගෙන් ඉල්ලා ඇත්තේ ක්‍රිකට් තරගාවලිය සඳහා මහනුවර ප්‍ර‌දේශයට පැමිණෙන ක්‍රිකට් ලෝලීන්ට ඔවුන්ගේ නිවෙස්වල විධීමත් ආකාරයෙන් අමතර කාමර ලබාදිය හැකි ක්‍රමවේදයකට ඇතුළත් වන ලෙසයි. මේ තුලින් මහනුවර පදිංචිකරුන්ගේ ආර්ථිකයට අමතර ශක්තියක් ලබාගත හැකිවීම විශේෂත්වයකි.

ඉන්දු – පකිස්තාන ගැටුම නැරඹීමට ඉන්දියාවෙන් සහ පාකිස්තානයෙන් විශාල සංචාරකයන් පිරිසක් පැමිණීම හේතුවෙන් හෝටල් සඳහා ඉහළ ඉල්ලුමක් පවතී. මෙම තරගයේ ප්‍රවේශ පත්‍ර දැනටමත් අලෙවිවී අවසන්ව ඇති අතර, තරගය වෙන්වෙන්ම සංචාරකයින් 14000ක පිරිසක් ලියාපදිංචිවී ඇතැයි සඳහන් විය.

ශ්‍රී ලංකාව හා බංග්ලාදේශය අතර තරගය මේ මස 31දා මහනුවර පල්ලෙකැලේ ක්‍රීඩාංගණයේදී පැවැත්වෙන අතර, ඉන්දියා – පකිස්තාන තරගය සැප්තැම්බර් 2දා, ඉන්දියා – නේපාලය අතර තරගය සැප්තැම්බර් 4දා මහනුවරදී පැවැත්වීමට කටයුතු යොදා තිබේ.