හම්බන්තොට සූරියවැව මහින්ද රාජපක්ෂ ක්‍රීඩාංගණයේ පැවැත්වෙන ශ්‍රී ලංකා – ඔස්ට්‍රේලියා – එංගලන්ත තුන්කොන් විස්සයි 20 කාන්තා අවුරුදු 19න් පහළ ක්‍රිකට් තරගාවලියේ අද (01) පැවැති ශ්‍රී ලංකා – ඔස්ට්‍රේලියා තරගය උණුසුම් මුහුණුවරක් උසුලමින් තිබියදී ඔස්ට්‍රේලියාව අවසාන පන්දුවේදී ජය ලැබීය.

ශ්‍රී ලංකා 19න් පහළ කණ්ඩායම පන්දුවාර 20 අවසානයේ කඩුලු 7කට ලබාගත් ලකුණු 132 හඹායාමේදී ඔස්ට්‍රේලියා කාන්තා 19න් පහළ කණ්ඩායම ද ඕවර 20 අවසානයේ කඩුලු තුනකට ලකුණු 133ක් රැස් කර කඩුලු හතක ජයක් ලැබීය.

ශ්‍රී ලංකා 19න් පහළ කණ්ඩායම වෙනුවෙන් සංජානා කවිඳි පන්දු 29කදී හතරේ අටක් සමඟ ලකුණු 39ක් ද නායිකාව මනුදි නානායක්කාර පන්දු 18කදී හතරේ තුනක් සමඟ ලකුණු 19ක් ද රශ්මි නේත්‍රාංජලී පන්දු 13කදී හතරේ තුනක් සමඟ ලකුණු 16ක් ද රශ්මිකා සෙව්වන්දි පන්දු 11කදී හතරේ දෙකක් සමඟ ලකුණු 14ක් ද දෙව්මිණි විජේරත්න පන්දු 25කදී හතරේ පහරක් සමඟ ලකුණු දහයක් ද ලැබුහ.

ශ්‍රී ලංකා ප්‍රථම කඩුල්ලට සංජානා කවිඳි සහ දෙව්මිණි විජේරත්න ප්‍රථම කඩුල්ලට පන්දුවාර 8.2කදී (පන්දු 50) එක් කළ ලකුණු 47ක සබඳතාව මේ ඉනිමේ වැඩිම සබඳතාවයයි.

ඔස්ට්‍රේලියානු නායිකාව ලුසි හැමිල්ටන් පන්දු 41කදී හතරේ අටක් සමඟ නොදැවී ලකුණු 56ක් රැස් කර මේ තරගයේ වැඩිම ලකුණු ලාභිනිය වූවාය.

ලකුණු පුවරුව

ශ්‍රී ලංකා කාන්තා 19න් පහළ කණ්ඩායම පන්දුවාර 20දී කඩුලු 7ට 132යි

(සංජානා කවිඳි 39, මනුදි නානායක්කාර 19, රශ්මි නේත්‍රාංජලි 16, රශ්මිකා සෙව්වන්දි 14, මැගී ක්ලාක් 18/2, ජුලියට් මෝටන් 12/2)

ඔස්ට්‍රේලියා කාන්තා 19න් පහළ කණ්ඩායම පන්දුවාර 20දී කඩුලු 3ට 133යි

(ලුසි හැමිල්ටන් නොදැවී 56, ග්‍රේස් ලියෝන්ස් 30, එලා බ්‍රිස්කො නොදැවී 14, රශ්මිකා සෙව්වන්දි 15/1, ශෂිනි ගිම්හානි 27/1යි)

බන්දුල මොල්ලිගොඩ