ශ්‍රී ලංකා ක්‍රිකට් ආයතනය විසින් සංවිධානය කරන ලද ‘ටියර් බී‘ හෙවත් ආරාධිත කණ්ඩායම් අතර පැවැති තෙදින ලීග් ලීග් ක්‍රිකට් තරගාවලියේ ශූරයින් බවට පත්වීමට ගාල්ල ක්‍රිකට් සමාජය සමත්වී තිබේ. කණ්ඩායම් 12 කගේ සහභාගිත්වයෙන් පැවැති මෙම තරගාලියේදී පූර්ණ තරග ජයග්‍රහණ 7 ක් වාර්තා කරමින් ගාලු ක්‍රීඩා සමාජය මෙවර ශූරතා කුසලානට අමතරව මුදලින් රුපියල් ලක්ෂ 15 ක ජයමල්ලකටද හිමිකම් කීවේය.

ඒ අනුව ගාලු ක්‍රීඩා සමාජය මෙවර තරග වාරයේ තරග 11 කට සහභාගිවෙමින් පූර්ණ ජයග්‍රහණය 7 ට අමතරව පළමු ඉනිමේ ජයග්‍රහණයක් ද සමගින් ප්‍රසාද ලකුණු 134.56 ක් ලබා ගැනීමට සමත්විය. මෙම ප්‍රසාද ලකුණු සටහනේ දෙවැනි ස්ථානය ප්‍රසාද ලකුණු 129.69 ක් ලබා ගත් ලියෝ ක්‍රිකට් සමාජයද තෙවැනි ස්ථානය ප්‍රසාද ලකුණු 117.71 ක් ලබා ගත් මැලේ ක්‍රිකට් සමාජයද රැඳී සිටියහ. අනුශූරතාවයට පත් ලියෝ ක්‍රිකට් සමාජයට රුපියල් මිලියක ත්‍යාගයක් හිමිවිය.

මීට අමතරව තරගාවලියේ දක්ෂතම පන්දු යවන්නා ලෙසින් තරග 11 කදී කඩුලු 77 ක් දවා ගැනීමට සමත් නාවික හමුදා ක්‍රීඩා සමාජයේ ලක්ෂිත මදුශංකද දක්ෂතම පිතිකරුවා ලෙස තරග 11 කදී ලකුණු 649 ක් රැස් කළ ලන්කන් ක්‍රීඩා සමාජයේ අමිල සඳරුවන්ද කුසලාන සමඟ රු. ලක්ෂ 5 බැගින් හිමිකම් කියද්දී තරගාවලියේ වීරයා ලෙසින් තරග 11 කදී ලකුණු 659 ක් ලබා වැඩිම ලකුණු ලාභියා ලෙසින් සහ කඩුලු 25 ක් දවා ගැනිමට සමත් යුනයිටඩ් සඳර්න් ක්‍රීඩා සමාජයේ කවිඳු එදිරිවීර කුලාන සහ ඒ සදහා පිදෙන රුපියල් හත්ලක්ෂ පනස්දහසක මුදලට හිමිකම් කීවේය.

ජයග්‍රාහී ගාලු ක්‍රිකට් සමාජ කණ්ඩායම –

බුද්ධික හසරංග (නායක), සදෙව් ඉඳුවර, අමිත් එරන්ද, ලිසුල ලක්ෂාන් (කඩුලු රකින්නා), දුලාජ් රණතුංග, හසිත සුරංග, හංසමාන ද සිල්වා, නිමන්ත ගුණසිරි, රජීව වීරසිංහ, චානක දේවින්ද, උශාන් මනෝහර, අමිත කෞශල්‍ය, චතූපම ගුණසිංහ, හිරුෂ පියුමාල්, සාලින්ද උශාන්, සමිත් ඉසුරු, සම්පත් පෙරේරා, සුභානු රාජපක්ෂ, තරිඳු රුක්ශාන්, තිලංක ද සිල්වා, විදුර ලක්ශාන් සහ විශ්ව රාජපක්ෂ.