ජාතික කණ්ඩායමේ ක්‍රීඩිකාවන් රැසකගෙන් සමන්විත බංග්ලාදේශ ඒ කාන්තා කණඩායම ශ්‍රී ලංකා තරග සංචාරය යටතේ සහභාගිවුණු පස්වැනි සහ අවසන් විස්සයි-20 තරගයෙන් ශ්‍රී ලංකා කාන්තා ‘ඒ‘ කණ්ඩායමට එරෙහිව කඩුලු 8 ක පහසු ජයක් වාර්තා කිරීමට අද (19 දා) පස්වරුවේදී සමත්විය. ඒ අනුව දෙරට අතර තරගාවලිය 4-1 ක ලෙස ජය ගැනීමට ජ්‍යෙෂ්ඨ ක්‍රීඩිකාවන්ගෙන් සමන්විත බංග්ලාදේශ ඒ ක්‍රීඩිකාවෝ සමත්වූහ.

බංග්ලාදේශ ‘ඒ‘ කණ්ඩායමේ නායිකාවගේ ආරාධනයෙන් පන්දුවට පහර දුන් ශ්‍රී ලංකා ඒ කණ්ඩායම ලකුණු 54 කට දවාලීමට බංග්ලාදේශ පන්දු යවන්නියෝ සමත්වූහ. කොළඹ කෝල්ට්ස් ක්‍රීඩාංගණයේ පැවැති මෙම තරගයේදී ශ්‍රී ලංකා ඉනිම පන්දුවාර 16.2 කදී හමාර විය. ප්දු යැවීමේදී රබීයා ඛාන් කඩුලු 4 ක් දවා ගනිද්දී ෆාහිමා ඛාන්, නහිඩා අක්ටර් සහ මරුෆා අක්ටර් කඩුලු 2 බැගින් දවාගත් පන්දු යවන්නියන්ගේ සමාජිකාවෝ වූහ.

ඊට පිළිතුරු ඉනිම ක්‍රීඩා කිරීමේදී බංග්ලාදේශ ඒ පිතිකාරිණියෝ ඒ සඳහා පන්දුවාර 11.4 ක් වැය කළේ කඩුලු 2ක් පමණක් ප්‍රතිවාදී න් හමුවේ ලබා දෙමිනි. මෙහිදී වේගවත් පිතිහරඹයක නියැළිණු ඩිලාරා අක්ටර් පන්දු 34 කින් ලකුණු 33 ක් රැස් කර ගත්තාය.

ශ්‍රී ලංකා ‘ඒ‘ ඉනිම වෙනුවෙන් ලකුනු 10 සීමාව ඉක්මවාලීමට සමත්වූ එකම පිතිකාරිණිය බවට පත්වූයේ චේතනා විමුක්ති වන අතර ඇය පන්දු 20 කදී ලකුණු 11 ක් ලබා ගත්තාය.

ශ්‍රී ලංකා කාන්තා ඒ කණ්ඩායම පන්දුවාර 16.2 කදී සියලු දෙනා දැවී ලකුණු 54 යි

චේතනා විමුක්ති 11, රබීයා ඛාන් 07/3, ෆාහිමා ඛාන් 09/2, නහිඩා අක්ටර් 10/2, මරූෆා අක්ටර් 14/2

බංග්ලාදේශ කාන්තා ඒ කන්ඩායම පන්දුවාර 11.4 කදී කඩුලු 2 ක් දැවී ලකුනු 56 යි

ඩිලාරා අක්ටර් 33*, නිගර් සුල්තානා 14*,චේතනා විමුක්ති 05/1, නිමේෂා මදුශානි 09/1